ఢిల్లీ, కోల్‌కతా నుంచి గ్వాంగ్‌జౌకు విమానాలు.. ఐదేళ్ల తర్వాత భారత్-చైనా మధ్య మళ్లీ విమానాలు

భారత్, చైనా మధ్య విమాన రాకపోకలకు సంబంధించి దాదాపు ఐదేళ్ల నిరీక్షణకు తెరపడింది. కరోనా మహమ్మారి కారణంగా 2020 ప్రారంభంలో నిలిచిపోయిన విమాన సర్వీసులు త్వరలో పునఃప్రారంభం కానున్నాయి. ఈ పరిణామం భారత విమానయాన నెట్‌వర్క్‌లో ఒక చారిత్రక మైలురాయి అని ఎయిర్‌పోర్ట్స్ అథారిటీ ఆఫ్ ఇండియా (ఏఏఐ) అభివర్ణించింది.

2020లో కోవిడ్ వ్యాప్తితో ఇరు దేశాల మధ్య విమాన సర్వీసులు పూర్తిగా ఆగిపోయాయి. ఆ తర్వాత దౌత్యపరమైన, ఇతర నియంత్రణ సమస్యల కారణంగా సర్వీసుల పునరుద్ధరణలో జాప్యం జరిగింది. తాజాగా ఈ అడ్డంకులు తొలగిపోవడంతో ప్రయాణ, వాణిజ్య సంబంధాలు తిరిగి సాధారణ స్థితికి చేరుకోవడంలో ఇదొక సానుకూల ముందడుగుగా భావిస్తున్నారు.

ముఖ్యంగా, చైనాలోని ప్రధాన వాణిజ్య కేంద్రమైన గ్వాంగ్‌జౌ నగరానికి భారత్ నుంచి వ్యాపారులు, వాణిజ్యవేత్తలు, విద్యార్థులు పెద్ద సంఖ్యలో ప్రయాణిస్తుంటారు. ఈ నేపథ్యంలో ఢిల్లీ, కోల్‌కతా నుంచి గ్వాంగ్‌జౌకు నేరుగా విమానాలు నడపనుండటం ఎంతో కీలకం కానుంది. ఈ కొత్త మార్గాల వల్ల ఇరు దేశాల మధ్య ద్వైపాక్షిక వాణిజ్యం పెరగడంతో పాటు, ఎగుమతిదారులకు రవాణా సౌకర్యాలు సులభతరం కానున్నాయి.

ఎలక్ట్రానిక్స్, ఫార్మాస్యూటికల్స్, టెక్స్‌టైల్స్ వంటి రంగాల్లో భారత్-చైనాల మధ్య బలమైన వ్యాపార సంబంధాలు ఉన్నాయి. ఈ విమాన సర్వీసుల పునరుద్ధరణతో ఈ సహకారం మరింత బలపడుతుందని నిపుణులు అంచనా వేస్తున్నారు. అంతర్జాతీయ విమాన ప్రయాణంలో ఇది ఒక సరికొత్త అధ్యాయాన్ని ప్రారంభిస్తుందని, వాణిజ్యం, పర్యాటకం, ఆర్థిక సహకారానికి కొత్త అవకాశాలను సృష్టిస్తుందని ఏఏఐ తన ఎక్స్ ఖాతాలో పేర్కొంది.